پاسدارانِ انقلاب کے ترجمان بریگیڈیئر جنرل علی محمد نائینی شہید، ایران نے تصدیق کر دی

تہران : ایران کی سپاہِ پاسدارانِ انقلابِ اسلامی (IRGC) نے اپنے مرکزی ترجمان بریگیڈیئر جنرل علی محمد نائینی کی شہادت کی باضابطہ تصدیق کر دی ہے۔ ایرانی حکام کے مطابق جنرل نائینی امریکہ اور اسرائیل کے ایک مشترکہ حملے میں نشانہ بنے۔
پاسدارانِ انقلاب کی جانب سے جاری کردہ بیان میں کہا گیا ہے کہ بریگیڈیئر جنرل علی محمد نائینی کو ایک بزدلانہ کارروائی میں شہید کیا گیا۔ ایران نے اس شہادت کا براہِ راست ذمہ دار امریکہ اور اسرائیل کو قرار دیا ہے۔
جنرل نائینی پاسدارانِ انقلاب کے عوامی رابطوں اور میڈیا ونگ کے سربراہ کے طور پر انتہائی کلیدی عہدے پر فائز تھے اور تزویراتی محاذ پر اہم کردار ادا کر رہے تھے۔
تجزیہ کاروں کے مطابق، ایک سینیئر فوجی عہدیدار اور ترجمان کی شہادت سے مشرقِ وسطیٰ میں جاری کشیدگی میں مزید اضافے کا خدشہ ہے۔ ایران نے اس واقعے پر سخت ردعمل کا اشارہ دیتے ہوئے کہا ہے کہ "خونِ شہید رائیگاں نہیں جائے گا" اور دشمن کو اس کی قیمت چکانی پڑے گی۔