وزیراعلیٰ پنجاب مریم نواز کا ورلڈ چِلڈرن ڈے پر بچوں کے حقوق اور تحفظ کے حوالے سے پیغام

لاہور : وزیراعلیٰ پنجاب مریم نواز شریف نے ورلڈ چِلڈرن ڈے کے موقع پر بچوں کے حقوق اور ان کے تحفظ کے حوالے سے ایک اہم پیغام دیا ہے۔ انہوں نے کہا کہ بچوں کے خلاف تشدد اور سنگین جرائم کا خاتمہ یقینی بنایا جا رہا ہے، اور چائلڈ لیبر کے خاتمے کے لیے سخت کریک ڈاؤن جاری ہے۔

مریم نواز شریف نے اپنے پیغام میں کہا، "میرے پاکستان کا ہر بچہ لخت جگر ہے، میری اولاد کی طرح میرا مستقبل، میری ذمہ داری اور اولین ترجیح ہے۔ پنجاب کے ہر بچے کو محبت، دعاؤں اور رحمتوں سے بھرپور سلام پیش کرتی ہوں۔" انہوں نے کہا کہ جہاں بچے محفوظ ہوں، وہاں مستقبل روشن ہوتا ہے، اور پنجاب حکومت کا ہر قدم بچوں کی بھلائی، حفاظت اور خوشیوں کے لیے اٹھایا جا رہا ہے۔

وزیراعلیٰ نے پنجاب حکومت کے بچوں کے لیے کیے گئے اہم اقدامات کا ذکر کیا، جن میں بچوں کی صحت اور اعلیٰ تعلیم کو اولین ترجیح دینا شامل ہے۔ انہوں نے بتایا کہ "چائلڈ ہارٹ سرجری پروگرام" کے ذریعے ہزاروں بچوں کی زندگیاں بچائی جا چکی ہیں اور ٹائپ-ون شوگر کے مریض بچوں کو انسولین کٹس گھر گھر پہنچائی جا رہی ہیں۔

مریم نواز نے مزید کہا کہ آٹسٹک بچوں کے لیے پاکستان کا پہلا خصوصی آٹزم سکول قائم کر دیا گیا ہے، جس کا جلد افتتاح کیا جائے گا۔ اس کے علاوہ، ننھے بچوں کے لیے "نواز شریف انسٹیٹیوٹ آف ارلی ایجوکیشن" ہر ضلع میں قائم کیے جائیں گے۔

وزیراعلیٰ نے پنجاب میں بچوں کے تحفظ کے لیے جدید ترین اقدامات کا ذکر بھی کیا، جن میں "ورچوئل سینٹر فار چائلڈ سیفٹی پروگرام" شامل ہے، جو بچوں کی گمشدگی، استحصال اور دیگر خطرات کے کیسز کو جدید نظام کے تحت حل کر رہا ہے۔ اس کے علاوہ، چائلڈ لیبر کے انسداد کے لیے سخت کریک ڈاؤن بھی جاری ہے، تاکہ بچوں کے خلاف تشدد اور جرائم کا خاتمہ ممکن ہو سکے۔

مریم نواز نے جنوبی پنجاب میں غذائی قلت کے شکار بچوں کے لیے "سکول میل پروگرام" شروع کرنے کا بھی ذکر کیا تاکہ بھوک تعلیم کی راہ میں رکاوٹ نہ بنے۔ اس کے ساتھ ہی، سرکاری سکولوں میں بچوں کے لیے تمام ضروری سہولتیں فراہم کی جا رہی ہیں تاکہ ہر بچہ تعلیم کے حصول میں کامیاب ہو سکے۔

وزیراعلیٰ نے خصوصی بچوں کے حوالے سے بھی اہم اقدامات کا ذکر کیا، جن میں مصنوعی اعضا، ہیئرنگ ایڈز اور ویل چیئرز فراہم کرنا شامل ہے۔ انہوں نے کہا کہ "کوئی بچہ محروم، لاچار یا نظر انداز دکھائی دے تو نیند نہیں آتی۔" ان کا کہنا تھا کہ "جب تک ہر بچے کی آنکھوں میں خوبصورت مستقبل کی چمک نہیں آتی، جدوجہد مکمل نہیں ہوگی۔ پنجاب کا ہر بچہ پڑھے گا، صحت مند ہوگا، مسکرائے گا۔ ماں اپنے بچوں کو کبھی تنہا نہیں چھوڑتی۔"

مریم نواز نے اپنے پیغام کے آخر میں یہ عزم ظاہر کیا کہ پنجاب حکومت ہر بچے کے حقوق کا تحفظ کرنے، ان کی فلاح و بہبود کے لیے بھرپور اقدامات کرنے اور انہیں ایک روشن اور کامیاب مستقبل دینے کے لیے اپنی پوری کوشش کرے گی۔