ایران کا جواب نہ ملنے پر امریکی نائب صدر کا دورۂ پاکستان مؤخر، وائٹ ہاؤس کی تصدیق

اسلام آباد / واشنگٹن: امریکی نائب صدر جے ڈی وینس کا آج ہونے والا دورۂ پاکستان مؤخر کر دیا گیا ہے۔ وائٹ ہاؤس نے اس حوالے سے باضابطہ تصدیق کرتے ہوئے واضح کیا ہے کہ نائب صدر فی الحال مذاکرات کے لیے پاکستان روانہ نہیں ہوں گے۔
امریکی میڈیا رپورٹس کے مطابق مذاکرات کے دوسرے دور کے لیے نائب صدر جے ڈی وینس کا دورہ ایران کی جانب سے تاحال کوئی جواب نہ موصول ہونے کے باعث روکا گیا ہے۔ امریکی حکام کا کہنا ہے کہ تہران کے ردعمل میں تاخیر اس اہم سفارتی مشن کے راستے میں رکاوٹ بنی ہے۔ تاہم، حکام نے یہ بھی واضح کیا ہے کہ یہ دورہ منسوخ نہیں ہوا اور کسی بھی وقت دوبارہ طے (Reschedule) کیا جا سکتا ہے۔
دوسری جانب اقوام متحدہ کے سیکرٹری جنرل نے جنگ بندی میں توسیع کا خیر مقدم کرتے ہوئے پاکستان کی ثالثی کی کوششوں کی بھرپور حمایت کی ہے۔ یو این چیف نے اپنے بیان میں کہا کہ     پاکستان کی کوششیں کشیدگی میں کمی کی جانب ایک بڑا اور اہم قدم ہیں۔    امید ہے کہ یہ مذاکرات خطے کے مسائل کا جامع اور دیرپا حل تلاش کرنے کی راہ ہموار کریں گے۔    ایران اور امریکہ کے درمیان اس وقت سفارتکاری کے لیے بہترین موقع پیدا ہو چکا ہے۔
سیکرٹری جنرل اقوام متحدہ نے تمام متعلقہ فریقین سے پرزور اپیل کی ہے کہ وہ جنگ بندی کے معاہدے کا مکمل احترام کریں اور کسی بھی قسم کی اشتعال انگیزی سے گریز کریں تاکہ امن عمل کو سبوتاژ ہونے سے بچایا جا سکے۔
ماہرین کا کہنا ہے کہ جے ڈی وینس کا دورہ مؤخر ہونا عارضی رکاوٹ ہو سکتا ہے، لیکن پاکستان کی ثالثی اور اقوام متحدہ کی پشت پناہی خطے میں امن کی امیدوں کو برقرار رکھے ہوئے ہے۔