لاہور: پاکستان کرکٹ بورڈ (پی سی بی) نے ویسٹ انڈیز کے خلاف ون ڈے انٹرنیشنل سیریز کیلئے 16 رکنی قومی اسکواڈ کا اعلان کر دیا ہے جس کی قیادت بابراعظم کریں گے۔
تفصیلات کے مطابق پاکستان اور ویسٹ انڈیز کی کرکٹ ٹیموں کے درمیان ون ڈے سیریز کے تینوں میچز 8، 10 اور 12 جون کو راولپنڈی کرکٹ سٹیڈیم میں کھیلے جائیں گے اور یہ تمام میچز انٹرنیشنل کرکٹ کونسل (آئی سی سی) کرکٹ ورلڈ کپ سپر لیگ کا حصہ ہیں۔
قومی سکواڈ کی قیادت بابراعظم کریں گے جبکہ دیگر کھلاڑیوں میں شاداب خان، فخر زمان، امام الحق، افتخار احمد، حارث رؤف، عبداللہ شفیق، حسن علی، خوشدل شاہ، محمد حارث، محمد نواز، محمد رضوان، محمد وسیم جونیئر، شاہین شاہ آفریدی، شاہنواز دھانی اور زاہد محمود شامل ہیں۔
دونوں ٹیموں کے مابین سیریز مینیجڈ انوائرنمنٹ میں نہ ہونے کی وجہ سے آسٹریلیا کے خلاف اعلان کردہ 21 رکنی سکواڈ کو کم کرکے 16 کھلاڑیوں تک محدود کر دیا ہے کیونکہ ضرورت پڑنے پر کھلاڑیوں کو مختصر وقت میں بھی طلب کیا جاسکتا ہے۔
سیریز کے تربیتی کیمپ کیلئے قومی سکواڈ یکم جون کو راولپنڈی میں رپورٹ کرے گا جبکہ انگلش کاؤنٹی کرکٹ کھیلنے میں مصروف وکٹ کیپر بلے باز محمد رضوان، حسن علی، شاداب خان اور حارث رؤف بھی مقررہ وقت پر وطن واپس پہنچ جائیں گے۔
