وفاقی بجٹ پیش کرنے کی تاریخ میں تبدیلی، اب 10 جون کو پیش ہوگا

اسلام آباد:وفاقی حکومت نے مالی سال 2025-26 کے بجٹ کی پیش کش کی تاریخ تبدیل کرتے ہوئے 2 جون کی بجائے 10 جون کا اعلان کر دیا ہے۔ وزارت خزانہ کے ترجمان کے مطابق یہ تبدیلی بجٹ کی مکمل تیاری اور جامع جائزے کے لیے کی گئی ہے تاکہ تمام مالی امور کو بہتر طریقے سے حتمی شکل دی جا سکے۔

اسی دوران، حکومت اور عالمی مالیاتی ادارے (آئی ایم ایف) کے درمیان بجٹ سے متعلق مذاکرات آخری مراحل میں داخل ہو چکے ہیں اور توقع ہے کہ آج اہم پیش رفت سامنے آئے گی۔ ذرائع کا کہنا ہے کہ صنعتی شعبے پر ٹیکس کی شرح میں کمی اور دفاعی بجٹ میں ممکنہ اضافے جیسے حساس معاملات پر غور جاری ہے۔

مزید برآں، حکومت تنخواہ دار طبقے پر ٹیکس کا بوجھ کم کرنے کی کوششوں میں مصروف ہے جبکہ زرعی آمدنی پر ٹیکس وصولی کے حوالے سے بھی بات چیت ہو رہی ہے۔ اس کے علاوہ، صوبوں کی آمدنی بڑھانے کے حوالے سے بھی آئی ایم ایف کو حکومتی پلان پیش کیا جا چکا ہے۔

آئی ایم ایف وفد نے وزیراعظم، صدر، اور نائب وزیراعظم سمیت اعلیٰ قیادت سے ملاقاتیں کی ہیں، اور معاشی ٹیم کے ساتھ اسلام آباد میں مذاکرات جون کے مہینے تک جاری رہنے کا امکان ہے۔