پاک، روس تعلقات میں اہم پیش رفت: نائب وزیراعظم اسحاق ڈار اور سرگئی لاروف کا ٹیلیفونک رابطہ

اسلام آباد / ماسکو: پاکستان کے نائب وزیراعظم اور وزیرِ خارجہ سینیٹر اسحاق ڈار اور روسی وزیرِ خارجہ سرگئی لاروف کے درمیان ٹیلیفون پر رابطہ ہوا ہے، جس میں دوطرفہ تعاون سمیت خطے کی بدلتی ہوئی صورتحال پر تفصیلی تبادلہ خیال کیا گیا۔
اس اہم گفتگو کے دوران درج ذیل امور پر اتفاق کیا گیا۔دونوں رہنماؤں نے وزیراعظم شہباز شریف کے آئندہ دورہ روس کے لیے نئی تاریخوں پر مشاورت کی، جسے دوطرفہ تعلقات میں ایک سنگِ میل قرار دیا جا رہا ہے۔ بین الاقوامی امن و سلامتی کے امور پر بات چیت کی گئی اور دونوں ممالک نے عالمی فورمز پر ایک دوسرے کے ساتھ تعاون جاری رکھنے کے عزم کا اعادہ کیا۔
 اسحاق ڈار اور سرگئی لاروف نے دوطرفہ تعلقات کی رفتار کو برقرار رکھنے کے لیے مستقبل میں بھی مسلسل رابطے میں رہنے پر اتفاق کیا۔روسی وزیرِ خارجہ سرگئی لاروف نے مشرقِ وسطیٰ کی موجودہ صورتحال، بالخصوص ایران اور امریکہ کے درمیان جاری کشیدگی کو کم کرنے کے لیے پاکستان کی سفارتی کوششوں کو سراہا۔ انہوں نے تسلیم کیا کہ خطے میں استحکام کے لیے پاکستان کا مثبت کردار اہمیت کا حامل ہے۔
ملاقات کے اختتام پر نائب وزیراعظم اسحاق ڈار نے اپنے روسی ہم منصب سرگئی لاروف کو دورہ پاکستان کی باضابطہ دعوت بھی دی، تاکہ دونوں ممالک کے درمیان اسٹریٹجک اور معاشی شراکت داری کو مزید ٹھوس شکل دی جا سکے۔