امریکن سکھ وفد کی وزیر اعلیٰ پنجاب سے ملاقات، پنجابی میں گفتگو، خیرسگالی کا پیغام 

لاہور: وزیر اعلیٰ پنجاب مریم نواز شریف سے "سکھ آف امریکہ" کے 7 رکنی وفد نے حال ہی میں ملاقات کی، جس میں انہوں نے پنجابی میں گفتگو کی اور وفد کے لیے اپنا احترام اور خیرسگالی کا پیغام دیا۔

وفد نے پنجاب میں عوامی فلاحی منصوبوں، سکھ میرج ایکٹ کے نفاذ، اور کرسمس تقریبات کے پرامن انعقاد کو سراہا۔ ساتھ ہی، انہوں نے پنجابی زبان کے فروغ اور سائن بورڈز کی تنصیب پر بھی خوشی کا اظہار کیا۔

مریم نواز شریف نے کہا کہ پنجاب اور پاکستان کے لیے وفاداری اور احترام پر شکریہ ادا کرتی ہیں اور بتایا کہ 56 تاریخی گوردواروں کی بحالی اور مرمت جلد مکمل کی جائے گی۔ انہوں نے مزید کہا کہ 75 ہزار اقلیتی کارڈز کے ذریعے اقلیتوں کی فلاح اور معاشی ترقی کو فروغ دیا جا رہا ہے۔

وزیر اعلیٰ نے واضح کیا کہ پنجاب میں سکھ ورثے کے تحفظ کو اپنا فرض سمجھ کر اقدامات کیے جا رہے ہیں اور اقلیتوں کے حقوق اور ثقافتی ورثے کی حفاظت ترجیح ہے۔