واٹس ایپ صارفین کے لیے نیا سیکیورٹی فیچر متعارف کرانے کاامکان

کیلیفورنیا: واٹس ایپ نے اپنے صارفین کے لیے ایک نیا سیکیورٹی فیچر متعارف کرانے پر کام شروع کر دیا ہے جس کے ذریعے صارفین اپنے اکاؤنٹس کو پاس ورڈ سے محفوظ بنا سکیں گے۔ اس فیچر کو "اکاؤنٹ پاس ورڈ" کا نام دیا گیا ہے، اور اس کا مقصد موجودہ سیکیورٹی آپشنز جیسے ٹو اسٹیپ ویریفکیشن کے ساتھ اضافی تحفظ فراہم کرنا ہے۔

یہ فیچر ابھی تیاری کے مراحل میں ہے اور تمام صارفین کے لیے دستیاب نہیں ہے۔ توقع کی جا رہی ہے کہ جیسے دیگر بیٹا فیچرز، یہ بھی پہلے منتخب ٹیسٹرز کے لیے جاری کیا جائے گا اور پھر ایپ کے آئندہ ورژن میں وسیع پیمانے پر متعارف کرایا جائے گا۔

اکاؤنٹ پاس ورڈ فیچر کے تحت صارفین ایپ کی سیٹنگز میں جا کر حروف اور اعداد پر مشتمل پاس ورڈ بنا سکیں گے۔ بیٹا اپ ڈیٹس کے مطابق، پاس ورڈ کی لمبائی 6 سے 20 حروف کے درمیان ہوگی، جس میں کم از کم ایک حرف اور ایک عدد شامل کرنا ضروری ہوگا۔

یہ نیا پاس ورڈ واٹس ایپ کے موجودہ 6 ہندسوں والے ویریفکیشن کوڈ کے ساتھ کام کرے گا۔ لاگ ان یا اکاؤنٹ کی تصدیق کے وقت صارفین پہلے معمول کا ایس ایم ایس ویریفکیشن کوڈ درج کریں گے، اگر ٹو اسٹیپ ویریفکیشن فعال ہو گی تو اس کا کوڈ بھی دینا ہوگا، اور اس کے بعد ایپ نیا اکاؤنٹ پاس ورڈ درج کرنے کا تقاضا کرے گی۔