پاکستان اور چین کے درمیان ڈیجیٹل شعبے میں تعاون کو فروغ دینے پر اتفاق

اسلام آباد:اسلام آباد میں پاکستان اور چین نے ڈیجیٹل ٹیکنالوجی کے اہم شعبوں میں دوطرفہ تعاون کو مزید وسعت دینے پر اتفاق کیا ہے۔

وزارتِ انفارمیشن ٹیکنالوجی کے مطابق، وفاقی وزیر شزا فاطمہ خواجہ اور چین کے سفیر جیانگ زائیڈونگ کے درمیان ایک اہم ملاقات ہوئی، جس میں ڈیجیٹل معیشت، ابھرتی ہوئی ٹیکنالوجیز، اور مشترکہ منصوبوں میں تعاون بڑھانے کے امکانات پر تفصیلی بات چیت کی گئی۔

ملاقات کے دوران دونوں رہنماؤں نے جدید ٹیکنالوجی میں طویل المدتی شراکت داری کو مزید مضبوط بنانے کے عزم کا اظہار کیا۔ وزیر آئی ٹی شزا فاطمہ نے اس موقع پر پاکستان کے ڈیجیٹل ویژن کو اجاگر کیا، جو ملکی معیشت کو فروغ دینے اور عوامی سہولیات کو بہتر بنانے کے لیے ڈیجیٹل ٹولز کے مؤثر استعمال پر مبنی ہے۔

چینی سفیر جیانگ زائیڈونگ نے پاکستان کی ڈیجیٹل ترقی میں چین کی عملی معاونت اور مہارت کی فراہمی کا یقین دلایا، اور کہا کہ چین پاکستان کے ساتھ تکنیکی تعاون جاری رکھے گا۔

دونوں ممالک نے مشترکہ تحقیق، مہارت کے تبادلے، اور ڈیجیٹل معیشت کے اہم شعبوں میں استعداد بڑھانے جیسے اقدامات پر بھی گفتگو کی، اور اس بات پر زور دیا کہ ٹیکنالوجی کو سب کے لیے ترقی کا ذریعہ بنایا جائے۔

وزارت آئی ٹی کے مطابق، دونوں ممالک نے ایسے اقدامات کو فروغ دینے کے عزم کا اعادہ کیا جو باہمی مفاد کے تحت ڈیجیٹل شعبے میں تعاون کو مزید مستحکم کریں گے۔