ٹنڈوجام: شرجیل میمن کا سیلاب متاثرین کے لیے خدمات پر اعتماد کا اظہار

ٹنڈوجام: سندھ کے سینئر وزیر شرجیل میمن نے کہا ہے کہ سندھ حکومت نے سیلاب متاثرین کو مشکل وقت میں تنہا نہیں چھوڑا اور انہیں گھر بنا کر دینے کا کام جاری ہے۔ شرجیل میمن نے پیپلز ہاؤسنگ سکیم کو دنیا کی تاریخ کا ایک بڑا منصوبہ قرار دیا۔

انہوں نے بتایا کہ 2022 میں سیلاب نے سندھ میں تباہ کاری مچائی، جس کے بعد بلاول بھٹو نے وزیراعلیٰ سندھ کو متاثرین کے لیے گھر بنانے کا ٹاسک دیا تھا۔ وزیراعلیٰ نے ورلڈ بینک کی مدد سے اس منصوبے کو عملی جامہ پہنانا شروع کیا۔

شرجیل میمن نے کہا کہ سندھ حکومت عوام کی فلاح و بہبود کے لیے کام کر رہی ہے اور پیپلز پارٹی نے جو خدمات سرانجام دیں وہ تاریخ میں نمایاں ہیں۔ انہوں نے کہا کہ سندھ میں غریبوں کو مفت سولر سسٹمز اور بجلی فراہم کی جا رہی ہے۔

انہوں نے کہا کہ سندھ کا ہاؤسنگ منصوبہ گنیز بک آف ورلڈ ریکارڈ میں شامل ہوگا اور مالکانہ حقوق خواتین کو بھی دیے گئے ہیں۔ شرجیل میمن نے بے نظیر انکم سپورٹ پروگرام سمیت دیگر عوامی پروگرامز کو صدر آصف زرداری کے اقدامات قرار دیا۔