بھارتی ہائی کمیشن نے پاکستان کو دریاؤں میں سیلاب کی صورتحال سے آگاہ کر دیا

اسلام آباد : پاکستان کے این ڈی ایم اے کے مطابق، بھارتی ہائی کمیشن نے پاکستان کو دریائے ستلج، راوی اور چناب میں سیلابی ریلے کے بارے میں اطلاع دی ہے۔

انڈس واٹر کمیشن نے بھی اس سیلابی صورتحال کے حوالے سے الرٹ جاری کر دیا ہے۔ بھارت کی طرف سے دریائے ستلج میں ہریکے اور فیروزپور کے نیچے پانی چھوڑا جائے گا۔ اسی طرح دریائے چناب میں اکھنور کے نیچے اور دریائے راوی میں مادھو پور کے نیچے پانی چھوڑنے کی اطلاع ملی ہے۔

بھارت سے پانی چھوڑے جانے کے ساتھ ساتھ مسلسل بارشوں کی وجہ سے دریائے راوی، چناب اور ستلج میں سیلاب کی حالت مزید سنگین ہو گئی ہے۔

سیالکوٹ، نارووال، شکرگڑھ اور دیگر علاقوں میں برساتی نالوں کا پانی قابو سے باہر ہو گیا ہے، جس کے نتیجے میں کئی دیہات پانی میں ڈوب گئے ہیں۔ بھارت کی جانب سے آنے والے پانی اور بارشوں کی وجہ سے پنجاب کے مختلف اضلاع کو شدید نقصان پہنچ رہا ہے۔