پاکستان کی سفارتی کامیابی: امریکی میگزین نے فیلڈ مارشل عاصم منیر کو سراہا، صدر ٹرمپ کی حمایت بھی حاصل

واشنگٹن: پاکستان نے امریکی صدر کی حمایت حاصل کرنے میں نمایاں کامیابی حاصل کی ہے، جس کا اعتراف امریکی میگزین "دی نیشنل انٹرسٹ" نے کیا ہے۔ رپورٹ میں کہا گیا ہے کہ فیلڈ مارشل سید عاصم منیر کی حکمت عملیوں نے پاکستان کو اقتصادی اور سفارتی میدان میں مضبوط مقام دلایا ہے۔

امریکی صدر نے فیلڈ مارشل عاصم منیر کو وائٹ ہاؤس میں خصوصی لنچ پر مدعو کیا، جہاں ان کی کامیاب پالیسیوں اور دو طرفہ تعلقات کو مضبوط بنانے پر بات چیت ہوئی۔ رپورٹ کے مطابق، فیلڈ مارشل نے پاکستانی معیشت کے لیے اہم اقتصادی معاہدے حاصل کیے جبکہ بھارت پر تجارتی ٹیرفز بھی عائد کیے گئے۔

ٹرمپ انتظامیہ نے ان معاہدوں کا اعلان کرتے ہوئے پاکستان کے ساتھ تعلقات کو نئی بلندیوں تک پہنچانے کی خواہش کا اظہار کیا ہے۔ مزید برآں، امریکہ کی جانب سے بلوچ لبریشن آرمی (بی ایل اے) کو دہشت گرد تنظیم قرار دینا بھارت سے دوری کا واضح اشارہ سمجھا جا رہا ہے۔

یہ تمام پیش رفت پاکستان کے لیے ایک بڑی سفارتی کامیابی قرار دی جا رہی ہے، جس سے خطے میں سیاسی توازن پر مثبت اثرات مرتب ہوں گے۔