پنجاب میں بارش سے سردی کی لہر: مری میں برفانی طوفان کا الرٹ جاری

لاہور: لاہور سمیت پنجاب کے مختلف شہروں میں وقفے وقفے سے جاری بارش نے موسم کو مزید سرد کر دیا ہے، جبکہ محکمہ موسمیات نے سیاحتی مقام مری کے لیے خطرناک موسمی صورتحال کی وارننگ جاری کر دی ہے۔
لاہور، گوجرانوالہ، سیالکوٹ اور پنجاب کے دیگر حصوں میں بادلوں کے برسنے سے درجہ حرارت میں نمایاں کمی ریکارڈ کی گئی ہے۔ لاہور میں آج درجہ حرارت 13°C تک گر گیا ہے اور ٹھنڈی ہواؤں کے باعث سردی کی شدت میں اضافہ محسوس کیا جا رہا ہے۔ محکمہ موسمیات کا کہنا ہے کہ بارش کا یہ سلسلہ آئندہ 24 گھنٹوں تک وقفے وقفے سے جاری رہ سکتا ہے۔
محکمہ موسمیات نے ملکہ کوہسار مری اور گلیات میں شدید برفباری کے ساتھ برفانی طوفان (Blizzard) کی پیشگوئی کی ہے۔سیاحوں کے لیے ہدایات: انتظامیہ نے سیاحوں کو خبردار کیا ہے کہ وہ شدید برفباری اور طوفانی ہواؤں کے پیشِ نظر مری کا رخ کرنے سے گریز کریں۔
برفانی طوفان کے باعث سڑکیں بند ہونے اور بجلی کی فراہمی معطل ہونے کا خدشہ ظاہر کیا گیا ہے۔ماہرینِ موسمیات کے مطابق مغربی ہواؤں کا ایک طاقتور سلسلہ ملک کے بالائی اور وسطی حصوں پر اثر انداز ہو رہا ہے، جس کے نتیجے میں میدانی علاقوں میں بارش اور پہاڑی علاقوں میں شدید برفباری کا امکان برقرار ہے۔