معلومات تک رسائی ہر شہری کا بنیادی اور جمہوری حق ہے , صدر زرداری , وزیر اعظم شہباز شریف

اسلام آباد :  صدرِ مملکت آصف علی زرداری اور وزیرِاعظم محمد شہباز شریف نے عالمی دن برائے معلومات تک رسائی کے موقع پر اپنے پیغامات میں اس بات پر زور دیا کہ معلومات تک رسائی ہر شہری کا بنیادی اور جمہوری حق ہے۔

صدر آصف علی زرداری نے کہا کہ معلومات کا آزادانہ بہاؤ شفافیت، جوابدہی اور بہتر حکمرانی کو فروغ دیتا ہے۔ انہوں نے خبردار کیا کہ غلط معلومات اور جعلی خبریں آج کے دور کا بڑا چیلنج ہیں جو نہ صرف سچ کو مسخ کرتی ہیں بلکہ قومی یکجہتی اور عوامی اعتماد کو بھی نقصان پہنچاتی ہیں۔ صدر نے کہا کہ ذمہ دارانہ رپورٹنگ اور درست معلومات کی فراہمی جمہوری استحکام کے لیے نہایت ضروری ہے، اور بروقت معلومات شہریوں کو بااختیار بناتی ہیں۔

صدر نے عوام سے اپیل کی کہ وہ سوشل میڈیا پر غیر مصدقہ خبریں پھیلانے سے گریز کریں اور تمام اداروں پر زور دیا کہ معلومات تک رسائی کے نظام کو مزید مؤثر بنایا جائے تاکہ شفافیت، ترقی اور انصاف کو فروغ دیا جا سکے۔

وزیرِاعظم محمد شہباز شریف نے بھی کہا کہ معلومات تک رسائی ہر فرد کا بنیادی حق ہے، جو شفاف حکمرانی اور عوامی خودمختاری کا ضامن ہے۔ انہوں نے بتایا کہ پاکستان نے اس حق کو یقینی بنانے کے لیے قانون سازی اور ادارہ جاتی اصلاحات کی ہیں تاکہ ہر شہری، خاص طور پر خواتین، نوجوانوں اور پسماندہ طبقات کو ڈیجیٹل دور میں معلومات تک برابر رسائی حاصل ہو۔

وزیرِاعظم نے پاکستان انفارمیشن کمیشن کے کردار کو سراہتے ہوئے کہا کہ یہ ادارہ حق تک رسائی قانون 2017 کے تحت شہریوں کو معلومات فراہم کرنے اور شکایات کے ازالے میں اہم کردار ادا کر رہا ہے۔

انہوں نے حکومت، سول سوسائٹی، میڈیا اور ٹیکنالوجی پلیٹ فارمز پر زور دیا کہ وہ مل کر ایک کھلا، شفاف اور علم پر مبنی معاشرہ تشکیل دیں، جو جمہوریت کو مضبوط اور ملک کی ترقی کے سفر کو تیز کرے۔