مختلف علاقوں میں شدید دھند ، موٹر ویز ٹریفک کے لیے بند

اسلام آباد: سینٹرل پاکستان کے مختلف علاقوں میں شدید دھند کی وجہ سے متعدد موٹرویز کو ٹریفک کے لیے بند کر دیا گیا ہے۔ ترجمان موٹروے پولیس کے مطابق، موٹروے ایم-2 لاہور سے کوٹ مومن تک، ایم-3 فیض پور سے درخانہ تک اور ایم-4 پنڈی بھٹیاں سے خانیوال تک دھند کے سبب بند کر دی گئی ہیں۔

اس کے علاوہ، لاہور-سیالکوٹ موٹروے ایم-11 بھی دھند کی شدت کی وجہ سے ٹریفک کے لیے بند کر دی گئی ہے۔ قومی شاہراہ پر لاہور، پتوکی، اوکاڑہ اور ساہیوال کے علاقوں میں بھی شدید دھند چھائی ہوئی ہے۔ چیچہ وطنی، اقبال نگر، میاں چنوں، خانیوال، ملتان اور بہاولپور میں بھی دھند کی وجہ سے حدِ نگاہ متاثر ہو رہی ہے۔

موٹروے پولیس نے کہا کہ ان علاقوں میں موٹرویز کی بندش کا مقصد عوام کی جان و مال کی حفاظت کو یقینی بنانا ہے۔ حکام نے شہریوں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی ہے۔