مودی حکومت کا عالمی سطح پر بیانیہ مسترد، راہول گاندھی کی مودی سرکار کی خارجہ پالیسی پر کڑی تنقید

نئی دہلی: بھارتی اپوزیشن لیڈر راہول گاندھی نے وزیراعظم نریندر مودی کی حکومت کی عالمی سطح پر ناکامیوں کو بے نقاب کر دیا ہے۔ لوک سبھا میں اپنے خطاب کے دوران راہول گاندھی نے مودی سرکار کی خارجہ پالیسی پر کڑی تنقید کی اور کہا کہ دنیا بھر میں بھارتی موقف کو مسترد کر دیا گیا ہے۔

راہول گاندھی نے بھارتی وزیر خارجہ جے شنکر کی حالیہ تقریر پر سوالات اٹھائے جس میں انہوں نے دہشت گردی کی مذمت کرنے والے ممالک کے بیانیے کی بات کی۔ راہول گاندھی نے کہا کہ جے شنکر نے یہ نہیں بتایا کہ "پہلگام" کے بعد کسی ملک نے پاکستان کا نام تک نہیں لیا، جس سے بھارت کی سفارتی پوزیشن کمزور ہوئی ہے۔ گاندھی کا کہنا تھا کہ "دنیا بھارت کو اب پاکستان کے برابر سمجھنے لگی ہے۔"

امریکی صدر ڈونلڈ ٹرمپ کے بیانات نے بھی بھارتی سرکار کے بیانیے کو تنقید کا نشانہ بنایا ہے۔ ٹرمپ نے کئی مرتبہ جنگ بندی میں کردار ادا کرنے کی بات کی اور پاکستان کے مؤقف کی عالمی سطح پر حمایت کی۔ اس کے برعکس، بھارت کی حکومت کا کمزور اور مبہم موقف عالمی سطح پر بے رحمی سے مسترد کیا جا چکا ہے۔

راہول گاندھی نے مزید کہا کہ مودی سرکار کی ناکامیوں نے بھارت کو عالمی سیاست میں تنہائی کی طرف دھکیل دیا ہے اور عالمی رہنما اب بھارتی موقف کو اہمیت دینے کے بجائے پاکستان کی جانب جھکاؤ رکھتے ہیں۔

مودی سرکار کی خارجہ پالیسی پر یہ تازہ تنقید بھارتی سیاست میں ایک نئی بحث کا آغاز کر رہی ہے، جس کے اثرات بھارت کی عالمی پوزیشن اور تعلقات پر پڑ سکتے ہیں۔