ایران پر امریکہ اور اسرائیل کا بڑا فضائی حملہ: تبریز کا پیٹرو کیمیکل پلانٹ نشانہ، تہران میں بجلی معطل

تہران / تبریز: مشرقِ وسطیٰ میں کشیدگی ایک نئے اور خطرناک مرحلے میں داخل ہو گئی ہے جہاں امریکہ اور اسرائیل نے مشترکہ کارروائی کرتے ہوئے ایران کے اہم شہر تبریز اور گردونواح کو نشانہ بنایا ہے۔ایرانی سرکاری میڈیا کی رپورٹس کے مطابق، حملے کا بنیادی ہدف تبریز میں واقع ایک بڑا پیٹرو کیمیکل پلانٹ تھا۔
 ریسکیو اور آپریشنل ٹیمیں فوری طور پر جائے وقوعہ پر پہنچ گئی ہیں اور امدادی کارروائیاں جاری ہیں۔ حکام کا دعویٰ ہے کہ پلانٹ کو نقصان پہنچنے کے باوجود کسی قسم کا کوئی خطرناک، زہریلا یا آلودگی پھیلانے والا مادہ خارج نہیں ہوا، جس سے بڑی تباہی کا خطرہ ٹل گیا ہے۔
فضائی حملوں کے اثرات صرف تبریز تک محدود نہیں رہے بلکہ دارالحکومت تہران اور صوبہ البرز بھی شدید متاثر ہوئے ہیں۔ حملوں کے فوراً بعد تہران کے متعدد علاقوں میں بجلی کی فراہمی منقطع ہوگئی، جس سے نظامِ زندگی مفلوج ہو کر رہ گیا۔ ایرانی حکام نے تصدیق کی ہے کہ حملوں کی زد میں آنے سے البرز میں بجلی کا مرکزی گرڈ اسٹیشن متاثر ہوا ہے، جو بجلی کی معطلی کی بڑی وجہ بنا۔
اس مشترکہ حملے نے خطے میں جنگ کے بادل مزید گہرے کر دیے ہیں۔ تہران میں سیکیورٹی ہائی الرٹ کر دی گئی ہے اور ایران کے دفاعی نظام (Air Defense System) کے فعال ہونے کی بھی اطلاعات ہیں۔