صرافہ مارکیٹ میں ہلچل ،سونے کی قیمت میں فی تولہ 25 ہزار 500 روپے کی بڑی گراوٹ

کراچی: ملک بھر میں سونے کی آسمان سے باتیں کرتی قیمتوں کو ریورس گیئر لگ گیا ہے، جہاں ایک ہی دن میں فی تولہ سونا 25 ہزار 500 روپے سستا ہو گیا ہے۔
صرافہ مارکیٹ کے تازہ ترین اعداد و شمار کے مطابق، اس بڑی کمی کے بعد فی تولہ سونے کی قیمت 5 لاکھ 11 ہزار 862 روپے مقرر کی گئی ہے۔ حیران کن طور پر گزشتہ دو روز کے دوران سونے کی قیمت میں مجموعی طور پر 61 ہزار روپے کی ریکارڈ کمی واقع ہو چکی ہے، جس نے خریداروں اور سرمایہ کاروں کو چونکا کر رکھ دیا ہے۔
سونے کے نقشِ قدم پر چلتے ہوئے چاندی کی قیمت میں بھی نمایاں کمی دیکھی گئی ہے۔ چاندی کی فی تولہ قیمت 2 ہزار 63 روپے کم ہونے کے بعد 9 ہزار 6 روپے کی سطح پر آگئی ہے۔ تجزیہ کاروں کا کہنا ہے کہ قیمتوں میں یہ اچانک اور بڑی کمی عالمی مارکیٹ میں ہونے والی تبدیلیوں یا روپے کی قدر میں بہتری کا نتیجہ ہو سکتی ہے۔ اس بڑی گراوٹ کے باعث جیولری مارکیٹس میں گاہکوں کا رش بڑھنے کا امکان ہے۔