پاکستان میں کل سے مون سون بارشوں کا نیا سلسلہ ، سیلاب اور لینڈ سلائیڈنگ کا خدشہ

اسلام آباد: پاکستان کے محکمہ موسمیات نے چار اگست سے ملک کے بیشتر علاقوں میں موسلا دھار بارشوں، تیز ہواؤں اور گرج چمک کے ساتھ سیلابی صورتحال کی پیش گوئی کی ہے۔ مون سون کا چھٹا سپیل پہلے سے موجود سیلابی صورت حال کو مزید سنگین بنا سکتا ہے۔

محکمہ موسمیات کے مطابق اس وقت ملک کے بالائی اور وسطی علاقوں میں کمزور مون سون ہوائیں داخل ہو رہی ہیں، جن کی شدت چار اگست سے بڑھنے کا امکان ہے۔ ساتھ ہی، پانچ اگست تک ایک مغربی ہوا کا سلسلہ بھی مضبوط ہونے کی توقع ہے، جو متاثرہ علاقوں میں بارش برسانے والے نظام کو مزید تقویت دے گا۔

پاکستان کے زیر انتظام کشمیر اور گلگت بلتستان میں چار سے سات اگست کے دوران کہیں کہیں بارشوں اور چند مقامات پر موسلا دھار بارشوں کی توقع ہے۔ مظفرآباد، راولا کوٹ، وادی نیلم، دیامر، سکردو اور گلگت جیسے اہم مقامات پر شدید بارشیں متوقع ہیں، جن کے باعث پہاڑی علاقوں میں سیلاب اور لینڈ سلائیڈنگ کا خطرہ بڑھ سکتا ہے۔

خیبر پختونخوا کے مختلف اضلاع بشمول سوات، مانسہرہ، کوہستان، ایبٹ آباد اور ڈیرہ اسماعیل خان میں بھی چار سے سات اگست کے دوران تیز ہواؤں اور گرج چمک کے ساتھ موسلادھار بارشوں کا امکان ہے۔

وفاقی دارالحکومت اسلام آباد، لاہور، راول پنڈی، گوجرانوالہ، مری اور سیالکوٹ جیسے بڑے شہر بھی شدید بارشوں کا شکار ہو سکتے ہیں، جس سے شہری سیلاب اور دیگر مشکلات پیدا ہو سکتی ہیں۔ جنوبی پنجاب میں بھی معمولات زندگی متاثر ہونے کا خدشہ ظاہر کیا گیا ہے۔

محکمہ موسمیات نے خبردار کیا ہے کہ شدید بارشیں ندی نالوں میں طغیانی اور فلیش فلڈنگ کا سبب بن سکتی ہیں۔ پہاڑی علاقوں میں لینڈ سلائیڈنگ، سڑکوں کی بندش اور کمزور ڈھانچوں جیسے کچے گھروں کو نقصان پہنچنے کا خدشہ ہے۔

عوام اور مسافروں کو ہدایت کی گئی ہے کہ وہ غیر ضروری سفر سے گریز کریں اور محکمہ موسمیات کی ویب سائٹس یا پاک ویدر ایپ کے ذریعے تازہ ترین موسم کی صورتحال سے باخبر رہیں۔

اس پیش گوئی کے بعد نیشنل ڈیزاسٹر مینجمنٹ اتھارٹی اور صوبائی ڈیزاسٹر مینجمنٹ اتھارٹیز ممکنہ ہنگامی صورتحال سے نمٹنے کے لیے ہائی الرٹ پر ہیں۔