چیٹ جی پی ٹی کی مقبولیت میں غیر معمولی اضافہ: ہفتہ وار صارفین کی تعداد 70 کروڑ تک پہنچنے کی پیش گوئی

نیویارک: اوپن اے آئی کی مصنوعی ذہانت پر مبنی چیٹ جی پی ٹی ایپ نے صارفین کی تعداد میں زبردست اضافہ دیکھا ہے، اور کمپنی کی توقع ہے کہ اس ہفتے کے آخر تک اس ایپ کے ہفتہ وار صارفین کی تعداد 70 کروڑ تک پہنچ جائے گی۔

اوپن اے آئی کے نائب صدر اور چیٹ جی پی ٹی ایپ کے ہیڈ، نک ٹرلی نے اس کامیابی کا اعلان کرتے ہوئے کہا کہ "یہ تیز رفتار ترقی اور عالمی سطح پر بڑھتی ہوئی مقبولیت کی عکاسی کرتا ہے، جہاں لوگ روزانہ اس ایپ کو سیکھنے، تخلیق کرنے اور مسائل حل کرنے کے لیے استعمال کر رہے ہیں۔"

This week, ChatGPT is on track to reach 700M weekly active users — up from 500M at the end of March and 4× since last year. Every day, people and teams are learning, creating, and solving harder problems. Big week ahead. Grateful to the team for making ChatGPT more useful and…

— Nick Turley (@nickaturley) August 4, 2025

مارچ کے آخر تک چیٹ جی پی ٹی کے ہفتہ وار صارفین کی تعداد 50 کروڑ تھی، اور اب یہ تعداد چار گنا بڑھ چکی ہے۔ اوپن اے آئی نے مزید بتایا کہ اپریل کے آغاز تک اس کے فعال صارفین کی تعداد 13 کروڑ سے تجاوز کر گئی تھی، جنہوں نے اس دوران 70 کروڑ سے زائد تصاویر تخلیق کیں۔

چیٹ جی پی ٹی کی مقبولیت میں اضافے کا ایک بڑا سبب مارچ میں متعارف کرایا جانے والا نیا تصویری فیچر ہے، جو جی پی ٹی-4 ماڈل پر مبنی ہے۔ اس فیچر نے صارفین کو تخلیقی کام کرنے کے لیے نئے مواقع فراہم کیے، جس کی بدولت ایپ کی مقبولیت میں غیر معمولی اضافہ ہوا۔

کمپنی کی آمدنی میں بھی تیزی سے اضافہ ہوا ہے، کیونکہ اب 50 لاکھ کاروباری صارفین چیٹ جی پی ٹی کے پیڈ ورژن کا استعمال کر رہے ہیں، جب کہ جون میں یہ تعداد 30 لاکھ تھی۔

مارکیٹ ریسرچ ادارے سینسر ٹاور کی حالیہ رپورٹ کے مطابق، چیٹ جی پی ٹی استعمال کرنے والے افراد ایک ماہ میں اوسطاً 12 دن اس ایپ کو استعمال کرتے ہیں، جو گوگل اور ایکس (سابقہ ٹوئٹر) کے بعد تیسرے نمبر پر ہے۔ رپورٹ میں یہ بھی بتایا گیا کہ سال 2025 کی پہلی ششماہی میں صارفین نے روزانہ اوسطاً 16 منٹ چیٹ جی پی ٹی استعمال کیا۔

یہ تیز ترقی اس بات کا ثبوت ہے کہ چیٹ جی پی ٹی کی ٹیکنالوجی نہ صرف تفریحی بلکہ کاروباری اور تعلیمی میدان میں بھی اپنی جگہ بنا چکی ہے، اور یہ مستقبل میں مزید شعبوں میں اپنی موجودگی بڑھا سکتی ہے۔