عالمی برادری کی بھارتی جارحیت پر تشویش، دونوں ممالک سے تحمل کا مظاہرہ کرنے کی اپیل

اسلام آباد : عالمی برادری نے بھارت کی جانب سے پاکستان پر کیے گئے حملے کو افسوسناک قرار دیتے ہوئے دونوں ممالک سے تحمل کا مظاہرہ کرنے کی اپیل کی ہے۔

چینی وزارت خارجہ نے کہا کہ بھارت اور پاکستان دونوں کو سکون و تحمل کا مظاہرہ کرنا چاہیے، اور خطے میں بڑھتی کشیدگی پر تشویش ظاہر کی۔ انہوں نے بھارت کو مشورہ دیا کہ وہ پاکستان کے خلاف جارحیت سے گریز کرے، کیونکہ ایسے اقدامات خطے کی سلامتی کو خطرے میں ڈال سکتے ہیں۔

اقوام متحدہ کے سربراہ انٹونی گوتریس نے بھی پاکستان اور بھارت کے درمیان موجودہ کشیدگی پر ردعمل ظاہر کرتے ہوئے کہا کہ دونوں ممالک کو زیادہ سے زیادہ تحمل کا مظاہرہ کرنا چاہیے تاکہ صورتحال مزید خراب نہ ہو۔

متحدہ عرب امارات کے وزیر خارجہ شیخ عبداللہ بن زاید نے بھی پاکستان اور بھارت کے درمیان حالیہ کشیدگی پر گہری تشویش کا اظہار کیا ہے۔ انہوں نے کہا کہ یہ حساس صورتحال ہے اور اس کا پائیدار حل صرف سفارتکاری اور بات چیت سے ہی ممکن ہے۔ شیخ عبداللہ بن زاید نے دونوں ممالک سے درخواست کی کہ وہ امن کی راہ اختیار کریں تاکہ خطے میں استحکام برقرار رہے۔

امریکی صدر ڈونلڈ ٹرمپ نے بھارت کے پاکستان پر حملے کو شرمناک قرار دیتے ہوئے کہا کہ یہ حرکت قابل مذمت ہے۔ اس کے ساتھ ہی انہوں نے پاکستان کے خلاف بھارت کی کارروائی کی مذمت کی۔

پاکستان نے بھارتی جارحیت کے بعد عالمی سطح پر اپنی پوزیشن واضح کرتے ہوئے اقوام متحدہ کی سلامتی کونسل کو اس حملے سے آگاہ کیا۔ پاکستان نے کہا کہ وہ اپنے دفاع کا حق محفوظ رکھتا ہے اور بھارتی جارحیت کے جواب میں مناسب وقت اور مقام کا تعین کرے گا۔

دوسری طرف، بھارت نے عرب ممالک بالخصوص متحدہ عرب امارات کے حکام سے رابطہ کیا اور درخواست کی کہ وہ پاکستان پر اثر و رسوخ استعمال کر کے کشیدگی کو کم کرنے کی کوشش کریں۔ تاہم، پاکستان نے واضح کیا کہ وہ اپنے دفاع کے حق کو تسلیم کرتا ہے اور بھارتی جارحیت کا بھرپور جواب دے گا۔