حالیہ بارشوں کے باعث پنجاب میں دریاؤں میں طغیانی کا شدید خدشہ، پی ڈی ایم اے کی عوام کو ہدایت

لاہور: پنجاب میں بالائی علاقوں میں حالیہ بارشوں کے باعث مختلف دریاؤں میں طغیانی کا خدشہ بڑھ گیا ہے۔ پنجاب ڈیزاسٹر مینجمنٹ اتھارٹی (پی ڈی ایم اے) نے شہریوں کو خبردار کرتے ہوئے کہا ہے کہ دریاؤں کی صورتحال بہت نازک ہے اور سیلابی حالات پیدا ہو سکتے ہیں۔

پی ڈی ایم اے کے ترجمان کے مطابق بھارت کی جانب سے آئندہ دو روز میں دریائے ستلج میں پانی چھوڑے جانے کا امکان ہے، جس سے صورتحال مزید خراب ہو سکتی ہے۔ بھارتی ڈیمز میں پانی کی سطح خطرناک حد تک پہنچ چکی ہے، جہاں بھاکڑا ڈیم 61 فیصد، پونگ ڈیم 76 فیصد اور تھین ڈیم 64 فیصد تک بھر چکے ہیں۔

ان حالات میں دریائے ستلج میں پانی کا بہاؤ غیر معمولی طور پر بڑھنے کا خدشہ ہے۔ پی ڈی ایم اے، محکمہ آبپاشی اور پاکستان ریورز اتھارٹی (ارسا) مل کر 24 گھنٹے دریاؤں اور ڈیمز کی نگرانی کر رہے ہیں۔

پی ڈی ایم اے کے ڈائریکٹر جنرل عرفان علی کاٹھیا نے بتایا کہ گنڈا سنگھ کے مقام پر دریائے ستلج کی سطح عارضی طور پر معمول پر آ چکی ہے، تاہم پانی کے بہاؤ میں دوبارہ اضافے کا خطرہ موجود ہے۔ مزید برآں، دریائے چناب میں مرالہ، خانکی اور قادر آباد کے مقامات پر درمیانے سے اونچے درجے کی سیلاب کی وارننگ جاری کر دی گئی ہے۔

عوام سے اپیل کی گئی ہے کہ وہ دریائی علاقوں میں احتیاط برتیں اور متعلقہ حکام کی ہدایات پر عمل کریں تاکہ کسی بھی ناخوشگوار واقعے سے بچا جا سکے۔