پاک فوج کی بھرپور جوابی کارروائی ، افغان طالبان نے جنگ بندی کی درخواست کر دی

چمن :  چمن کے سپن بولدک سیکٹر میں پاک فوج کی جانب سے افغان طالبان کی جارحیت کا منہ توڑ جواب دینے کے بعد افغان طالبان نے جنگ بندی کی درخواست کر دی ہے۔ سکیورٹی ذرائع کے مطابق پاک فوج نے افغان طالبان اور فتنہ الخوارج کی جانب سے سوشل میڈیا پر پھیلائی جانے والی جھوٹی ویڈیوز اور پروپیگنڈا کو بے بنیاد قرار دیا ہے۔

سکیورٹی ذرائع کا کہنا ہے کہ افغان طالبان کی جانب سے سوشل میڈیا پر ایک ویڈیو شیئر کی گئی تھی جس میں دعویٰ کیا گیا تھا کہ پاک فوج نے طالبان کے ہتھیار قبضے میں لے لیے ہیں۔ تاہم، ذرائع نے ان ویڈیوز کو "من گھڑت" قرار دیتے ہوئے کہا کہ ان میں کوئی صداقت نہیں ہے۔

پاک فوج کی جوابی کارروائی میں طالبان کی مختلف پوسٹوں، ٹینکوں اور دیگر فوجی اہداف کو نشانہ بنایا گیا، جس سے طالبان کے کئی مقامات کو نقصان پہنچا۔ سکیورٹی ذرائع کا مزید کہنا تھا کہ پاک فوج افغان طالبان اور فتنہ الخوارج کی کسی بھی مزید جارحیت کا منہ توڑ جواب دینے کے لیے ہمہ وقت تیار ہے، اور اس کارروائی میں شدت آنے کا امکان ہے۔

افغان طالبان کی جانب سے فائر بندی کی درخواست کے بعد دونوں طرف کی افواج میں عارضی سکوت دیکھا جا رہا ہے، لیکن سکیورٹی ماہرین کا کہنا ہے کہ صورتحال ابھی غیر مستحکم ہے اور اس میں کوئی بڑی تبدیلی جلد متوقع نہیں۔

پاک فوج کا واضح پیغام ہے کہ وہ کسی بھی قسم کی جارحیت کے سامنے سرنڈر نہیں کرے گی اور ہمیشہ اپنے دفاع میں مکمل طور پر تیار رہے گی۔