اسلام آباد: صدر مملکت آصف علی زرداری کا کہنا ہے کہ قومی سلامتی کمیٹی کے تمام فیصلے پاکستانی قوم کے دل کی آواز ہیں اور پوری قوم ان فیصلوں کے ساتھ کھڑی ہے۔
صدر زرداری سے وفاقی وزیر داخلہ محسن نقوی کی ملاقات ہوئی جس میں پہلگام واقعے کے بعد بھارت کے غیر ذمہ دارانہ اقدامات پر تفصیلی بریفنگ دی گئی۔ وزیر داخلہ نے صدر کو قومی سلامتی کمیٹی کے فیصلوں کے بارے میں آگاہ کیا، جس پر صدر زرداری نے کمیٹی کے بروقت، فوری اور دور اندیش فیصلوں کو سراہا۔
صدر مملکت نے کہا کہ بھارت کے بے بنیاد الزامات اور غیر منطقی اقدامات کا کوئی جواز نہیں بنتا۔ انہوں نے مزید کہا کہ قومی سلامتی کمیٹی نے پاکستانی قوم کی امنگوں کی ترجمانی کی ہے اور قوم کے تمام فیصلوں اور اقدامات کے ساتھ مکمل طور پر کھڑی ہے۔
اس موقع پر وزیر داخلہ محسن نقوی نے کہا کہ دشمن کو کوئی غلط فہمی نہیں ہونی چاہیے، پاکستان کا دفاع اللہ کی مدد سے ناقابل تسخیر ہے۔
