مجتبیٰ خامنہ ای کو ایران کا نیا سپریم لیڈر منتخب کر لیا گیا، اسرائیلی میڈیا کا دعویٰ

تل ابیب : اسرائیلی میڈیا کی رپورٹس کے مطابق، ایران کے موجودہ سپریم لیڈر آیت اللہ علی خامنہ ای کے بیٹے مجتبیٰ خامنہ ای کو ایران کا نیا سپریم لیڈر منتخب کیا گیا ہے۔ اطلاعات کے مطابق، ایران کی سپریم لیڈر کے انتخاب کے لیے قائم کمیٹی نے مجتبیٰ خامنہ ای کے نام کی منظوری دے دی ہے، اور ان کی باضابطہ نامزدگی کا اعلان چند گھنٹوں میں متوقع ہے۔

تاہم، ایرانی میڈیا کے مطابق نئے سپریم لیڈر کی نامزدگی کے لیے ابھی اجلاس جاری ہے، اور اس میں تقریباً ایک ہفتے کا وقت لگ سکتا ہے۔ ایران کے پاسداران انقلاب نے بھی کہا ہے کہ آیت اللہ خامنہ ای کی تدفین کے بعد نئے سپریم لیڈر کا باضابطہ اعلان کیا جائے گا۔

مجتبیٰ خامنہ ای ایک معروف ایرانی سیاستدان اور عالم دین ہیں، اور وہ اپنے والد آیت اللہ علی خامنہ ای کے دوسرے صاحبزادے ہیں۔ مجتبیٰ نے ایران عراق جنگ میں حصہ لیا تھا اور 2009 میں ہونے والے صدارتی انتخابات کے بعد مظاہروں کو دبانے کے لیے استعمال ہونے والی فورس پر بھی اثر و رسوخ رکھتے تھے۔ انہیں اپنے والد کا سب سے بااثر بیٹا اور ممکنہ جانشین سمجھا جاتا ہے۔

مجتبیٰ خامنہ ای 1969 میں مشہد میں پیدا ہوئے اور اپنے بچپن کے سات سال ایران کے شمال مغربی شہروں سردشت اور مہاباد میں گزارے۔ انہوں نے 2004 میں زہرہ حداد عادل سے شادی کی تھی۔ سیاسی طور پر وہ سابق ایرانی صدر محمود احمدی نژاد کے حامی سمجھے جاتے ہیں اور 2019 میں ان پر امریکہ کی جانب سے پابندیاں بھی عائد کی گئیں۔