کراچی: ملک بھر میں سونے کی قیمت میں ایک بار پھر نمایاں اضافہ دیکھنے میں آیا ہے، جس کے بعد سونا تاریخ کی بلند ترین سطح پر پہنچ گیا ہے۔
سندھ صرافہ بازار جیولرز ایسوسی ایشن کے مطابق، سونے کی فی تولہ قیمت میں 1,800 روپے کا اضافہ ہوا ہے، جس کے بعد نئی قیمت 3 لاکھ 40 ہزار 600 روپے ہو گئی ہے۔ اس سے قبل بھی سونے کی قیمت میں مسلسل اضافہ ہو رہا تھا، تاہم حالیہ اضافہ نے تمام سابقہ ریکارڈ توڑ دیے ہیں۔
اسی طرح 10 گرام سونے کی قیمت میں 1,543 روپے کا اضافہ ریکارڈ کیا گیا ہے، جس کے بعد اس کی نئی قیمت 2 لاکھ 92 ہزار 9 روپے ہو گئی ہے، جو کہ ملکی تاریخ کی بلند ترین سطح ہے۔
دوسری جانب عالمی مارکیٹ میں بھی سونے کی قیمتوں میں اضافہ ہوا ہے، جہاں فی اونس سونا 18 ڈالر اضافے کے بعد 3,236 ڈالر کی سطح پر پہنچ گیا ہے۔
ماہرین کے مطابق عالمی سطح پر معاشی غیر یقینی صورتحال، مہنگائی کا دباؤ اور ڈالر کی قیمت میں اتار چڑھاؤ سونے کی قیمت میں اضافے کی بنیادی وجوہات ہیں۔ سونا روایتی طور پر محفوظ سرمایہ کاری سمجھا جاتا ہے، جس کے باعث طلب میں اضافہ بھی قیمتوں کو اوپر لے جا رہا ہے۔
